Isinagawa ngayong umaga ng Martes, Disyembre 23, ang Victorio Edades Day Wreath Laying Ceremony sa Barangay Bolosan, Dagupan City, bilang paggunita sa buhay, tapang, at walang kapantay na ambag sa sining ng isa sa pinakadakilang anak ng lungsod.
Pinangunahan ni Mayor Belen T. Fernandez ang seremonya. kasama sina Coun. Michael Fernandez, Dir. Rex Catubig, Kapitan Nancy Morris, mga kasapi ng Barangay Council, at ang pamilya ng yumaong Pambansang Alagad ng Sining, sa isang simple ngunit makabuluhang pagtitipon.
*Maikling Kuwento ng Isang Pambansang Alagad ng Sining
Ipinanganak sa Dagupan noong 1895, si Victorio Edades ay humamon sa nakasanayang pamantayan ng sining. Sa halip na perpektong anyo, pinili niya ang katotohanan. Sa kabila ng matinding batikos sa kanyang matatapang na kulay at kakaibang estilo, nanindigan siya sa paniniwalang ang sining ay salamin ng tunay na buhay. Dahil sa kanyang tapang at paninindigan, umusbong ang bagong henerasyon ng mga alagad ng sining, at siya ay kinilala bilang Ama ng Makabagong Sining sa Pilipinas.
Ang pagdiriwang na ito ay hindi lamang pag alala, kundi isang malinaw na paalala: ang tunay na pagbabago ay nagsisimula sa lakas ng loob na manindigan. Mula Dagupan hanggang sa pambansang entablado, patuloy na nabubuhay ang pamana ni Victorio Edades sa bawat obrang may tapang at katotohanan.
